ನಿನೊಂದು ಬಿಳಿ ಚುಕ್ಕೆ

ನಿನ್ನದೊಂದೇ ಸೂರಿನಡಿ
ಎಷ್ಟೋ ಪ್ರೇಮಿಗಳ
ವಿರಹ ಕರೆಸಿ
ಕಳ್ಳನಗೆ ಬೀರುವೆ
ನಿನೊಡಲಲ್ಲಿ ಪುಂಜರಾಶಿ
ನಾನೆಷ್ಟು ಬಾರಿ ನಿನ್ನ
ಗುರಾಯಿಸಿದ್ದೇನೆ
ಏನಂತಾ ಪುಳಕ
ಏನಿಲ್ಲ ಹೊಳಪು
ಕಡು ನೀಲಿಕಪ್ಪಿನ ಮೈಯಲ್ಲಿ
ನಿನೊಂದು ಬಿಳಿ ಚುಕ್ಕೆ
ಎಷ್ಟು ಕರೆದರು
ನಿರ್ಭಾವುಕ ಚಂದ್ರ
ಏನು ಇಲ್ಲ
ಸುತ್ತಲು ತಾರೆಯರಿದ್ದಾರೆ
ಧಿಮಾಕು ನಿನಗೆ
ನಗುವುದೊಂದೇ ಗೊತ್ತು ಅವಕ್ಕೆ
ನನ್ನಂತೆ ಮುದ್ದಿಸಲಾರು!

-ಹರವು ಸ್ಫೂರ್ತಿಗೌಡ

ಕಾವಿಗೆ ಬೇಕು ಸರ್ವಥಾ

ವಿರಹ ಬೆಂಕಿ ಹತ್ತಿ
ಉರಿದು ಪ್ರೀತಿಧಾರೆ
ಅರಿಯುವ ವೇಳೆಗೆ
ಪ್ರಣಯದ ಉರಿ ನಿಲ್ಲಿಸಿದೆ
ಕಾದು ಕುದಿದು ಮರಳಿದ
ವಿರಹ ತಣ್ಣಗಾಗದು
ಸುಟ್ಟಿತು
ಹೃದಯ ಬಾಣಲೆ!
ಬೂದಿಯಾಗಿ ಹಾರಿ
ಗಾಳಿಯಲ್ಲಿ ಲೀನವಾಗದೆ
ಮೈಕಾವೇರಿಸುತ್ತಿದೆ
ಕಾಡಿಸುತ್ತಿದೆ
ನಿಲ್ಲದ ಜ್ವರದಂತೆ

-ಹರವು ಸ್ಫೂರ್ತಿಗೌಡ

ಮಾತು ನೀನು..ಮೌನ ನಾನು

ಮಾತಾಡ್ತೀಯಾ ಸಮೃದ್ಧಿಯಾಗಿ
ಮಾತಾಡ್ತಾನೇ ಇರ್ತಿಯಾ
ನಾನಂತು ಇಲ್ಲಿ ಮೌನ ಗೌರಿ
ನನ್ನ ಮಾತನ್ನು ಮರೆಸುವಷ್ಟು ಮಾತು
ತುಟಿ ಬಿರಿದು ನಗುವಾಗುತ್ತಿಯಾ
ಹೃದಯ ಕಟ್ಟೆ ಒಡೆಸಿ
ಕಲ್ಲಾದ ಭಾವ ಹರಿಸ್ತಿಯಾ
ಆದರೂ ನಾನಂತು ಇಲ್ಲಿ ಮೌನ ಗೌರಿ
ಆಸೆ, ಕನಸು, ಭವಿಷ್ಯಗಳ
ವಿನಿಮಯ, ವಿಚಾರ ಸಂಕಿರಣ
ರೇಗಿಸಿ ಕೆಂಪೇರಿಸ್ತಿಯಾ
ಅಳುಕಿದರೆ
ಹೆಣ್ಣೆದೆ ನೋವಾಯಿತೇನೋ?
ಮರುಗುತ್ತಿಯಾ!
ಆದರೆ ನಾನಂತು ಇಲ್ಲಿ ಮೌನ ಗೌರಿ
ಮಾತು ಕಸಿದುಕೊಂಡನು
ಯಾವತ್ತೋ ಇತ್ತ ಮೌನ ಉಡುಗೊರೆಯ
ಎಂದಿಗೂ ನಾನು ಮೌನ ಗೌರಿ..

-ಹರವು ಸ್ಫೂರ್ತಿಗೌಡ

ಭವಿಷ್ಯ ಬದಲಿಸಿ

ತಿರುಗಿಸಿ ಮುರುಗಿಸಿ ನೋಡಿರೋ
ಒಂದೇ ಹಣೆ ಬರಹ
ಭೂತದ ಭಯಕೋ
ಭವಿಷ್ಯದ ಆತಂಕ್ಕಕೋ
ಶೇರು ಸೂಚ್ಯಂಕವಾಗಬಾರದೇ..
ಎಷ್ಟು ಸಾರಿ ನೋಡಿದರು
ಬದಲಾಗುತ್ತಿಲ್ಲ ಭವಿಷ್ಯ
ಅದೇ ಮೇಷ, ವೃಷಭ, ಸಿಂಹ
ಅದೇ ಯೋಗ, ಅದೇ ಗ್ರಹಚಾರ
ಚೀರಿದೇ.. ಬದಲಿಸಿ ಭವಿಷ್ಯ
ಕಂಡುಕೊಳ್ಳಿ ಭವಿಷ್ಯವ
ಕಾಯಕದಲ್ಲಿ
ಯಾರೂ ಉಲಿದಿದ್ದರು ಶಾಂತೆಯಂತೆ

-ಹರವು ಸ್ಫೂರ್ತಿಗೌಡ